Hallo allemaole,
Wie bint er effen uut ewest met zien tweechies. Maor ik hebbe nog een verhaaltie uut de olde deuze.
Toen wie nog jong waar'n, wolle wie ons riebewies haal'n. Mien maoten
hadden er al iene of waar'n d'r met bezig, maor ik wolle mien
motorriebewies hebben! De motor hak al an eschaft veur een klein
priessie. En ai noe lesse hadd'n koi 25 kilometer um oe eigen adres hen
rieden umme te oefenen. Det waar'n nog iens tieden! Zo ginge wie in de
weekenden naor de Tonne toe met een heel kuppeltie. En ok det weekende
mosse wie daor hen en van mien va en mo mosse wie altied drek naor huus
als de Tonne dichte gunk. Zo stunne wie te wachte op mekare en ien van
mien maoten mos nog effen brommers kiek'n met een deerntie. Ik snappe
d'r op det moment niks van, want wie waar'n allemaole op de fietse.
Affijn, deur det gesodemieter kwam ik mooi te late in huus en mien va
stunt mie op te wacht'n. Kwaod det e was! Ien maond huusarrest en in de
weekende de koeie melk'n veur straf.
Ik hebbe nog esputtert maor det hielp niks. En teeg'n et weekende an
wurre ik nog kwaod ok, ik zate miezelf een bettie op te fokk'n en hebbe
mien tas epakt, kleer'n veur het weekende d'r in edaon en de motor uut
de schure ehaald. Ik gunk weg! Een entie van ons huus heb ik em an
etrapt en ginge op weg naor mien ome en tante in Breda.
Daor koi ok weh stapp'n en nog gezellig ok. Het gunk allemaole mooi, het
motortje reed as een tierelier. Noe waar ik gien grote keer'l, ik ware
maar een klein opdondertie en een bol kuppie hek altied al ehad. Noe bin
ik aordig egruuit veural in de breedte, mar toen in die tied? Ik binne
zo mooi an het toer'n en daor kump meneer pliesieagent mie tegemoet
ried'n, dus ikke heel zelfverzekerd zonder mien riebewies, stekke de
hand op! Det hak noe better niet kunn'n doen. Hij achter mie an en STOP!
Ja, en daor stoi dan, wat mos det kleine keer'ltie op zo'n grote motor.
De gevolgen: motor weg, veurkoom'n, enz. Iene bonke ellende, mien va
nog helliger en mien mo hef de met de klompe.....disse hak verdiend!
Maor waor ak op an wolle, een jaor of 10 terugge wol ik dan toch nog
mien motorriebewies haal'n. Fennigje an't foeteren, wat mui d'r met en
of ik in de middellevenscrisus zat? Ik op mien leeftijd zolle
verongelukken en het verkeer was veule drukker noe! Wat mut, det mut! Ik
gunge an het uutzuken waor ak het beste mien rielessen kon doen. Ik
kwame d'r achter det er veule mogelijkheden waar'n. En ik hadde dan ok
een mooi plannegie bedacht. Ik gunge lessen bie Brunen in Deurningen,
want daor koi in iene weke oe riebewies haal'n. Ik vertelde Fennigje det
ik maor iens een kunstreissie mosse maken naor Ootmarsum en dan zok
vief daag'n weg bliem. Fennigje vind et maor niets en daor hak ok al
een bettie op ehopt! Klodders met verve op een doek smeer'n en een mooi
lulverhaal en iniens is het Kunst! De lesse bie Brunen werd op de
parkeerplaatse bie Frans op de Bult egeem, de chauffeurs onder ons kent
allemaole Frans op de Bult weh.
Dus op maondagmorn naor Deurningen umme half iene mos ik d'r weez'n. Ik
mosse mar iens laoten zien wak konne. En det gunk prima. De biezundere
verrichtingen mos ik eerst mar iens leer'n. Het gunk mooi! Woensdagmorn
examen en weer wieder. In de middag toer'n deur de umgeving, ach
jongens, wat genieten en wat een mooie umgeving! En in mien oor de
leraar die mie vertelde waor ak op an mosse. Noe weer naor Boekelo, een
klein durpie waor ai niet harder macht dan 30 kilometer per uur. Wat
genieten! Ik hebbe 's nacht weer machtig fijn eslaopen bie Frans op de
Bult en umme acht uur heb ik mie weer emeld an de overkante bie de
rieskoele. De andere jongen die ok met reed stund a met zien pak an
klaor, noe ik nog. Wie waar'n d'r klaor veur! Eerst deur Hengelo umme
d'r effen weer in te kom. Heur ik de leraar in mien oor, wacht maor
effen nao de stoplichten, want die andere knaap en ik konden nog net
deur het gruune licht en de leraar mos wachten. Wie staot daor zo te
wachten tot hij d'r an kump en ja heur, daor vleug hij ons veurbie.
Wulle d'r achteran.wie mossen nog weh ons beste doen umme hem bie te
hol'n. En inziens heur ik de leraar zeg'n :" Ik zie ze niet!" Det kon ok
niet want hij ree veur ons! Over de snelweg waor ai 130 magt, reed hij
weh 150. Wie konden hem echt niet bie hold'n. En opiens zie ik de burden
van Duutsland!
Ik denke det er ietsie niet klopt. De leraar verdween as een klein
stippie Duutsland in. Ik zie nog zo zien witte buse met oranje scholders
en zien oranje helm!
Wie stunden veur de stoplichten te wachten en wie zeiden teeg'n mekare
dat wie mar iens de rieskoele mossen bellen. Wie kiekt naor rechts en
ziet daor de Grolschfabriek en det leek on wel een goede plekke umme te
wachten totdet ze ons op kwam haal'n.
Gien iene van beide de telefoon in de buse, dus wie an de receptie
vraog'n of ze de rieskoele wilden bellen? Daor brak de pleuris uut. Twee
leerlingen die zoek waren geraakt. Zie hadden Fennigje al ebeld of ik
mie al emeld hadde, en die wus van niks!
Wie bint mar snel naor buut'n egaon um te wacht'nop de leraar, want iederiene weet de Grolsch te vind'n.
Nao det wie daor een 20 minuut' estaon hebt, kump de leraar d'r an met
zien zwarte leren jassie! Juust, zelfde motor, zelfde helm, zelfde
koffers met ien klein verschilligie!
Ie kunt weh weer nao gaon hoe det is af eloop'n! Fennigje lilluk! Vrijdag examen ehad en ezakt.
Maak er veur de koom'nde tied wat moois van met mekare!
De groet'n
Hendrik
Geen opmerkingen:
Een reactie posten