Hendrik

Hallo allemaole,
Wulle bint nog steeds druk in de tuun, det blef ok maor deur gaon, helemaole noe het mooie weer d'r weer an kump. Tja en dan beij druk!
Zo ok vandage, ik mosse het grôs maaien van Fennigje! En daor hak helemaole gien schik van! De grôsmaaier had iedere keer kuur'n. En ak dan halverwege waar'n schei het mirakelse dink er weer met uut. Ik had het dink al zo vake weg ebracht en bie degene waor e emaakt werd dut het dan en ak dan weer begunne te meijen dan stopte d'r weer met. Ik kon nog better de grote geite van de buurman lien'n, dan wus ik zeker det het grôs d'r af kwamp.
Affijn ik hale ut dink uut de schuure en begun gelieke met maai'n. De vrouwe was toch an't boschopp'n haal'n, dus ha'k het riek veur mie allinig. Een stukkie harde wust op de voeste en daor gunk het henne.
Ik denk da'k op de helft ware toen ut dink er weer met uut schee. Ik kieke um mie hen en zage det pas gemaaide grôs, en op det moment viel' mie de oog'n zowat dichte van luiigheid. Ik mosse de euchies maor effen an de binnenkante bekieke'n. De buuse volden ik op tot een mooi kussentie en daor kon'k mooi een klein tukkie doen zo teeg'n de grôsmeijer an. Al snel waar ik onder zeil. En nao een poosie waar ik mie toch an't dreum'n. Ik lage zo mirakels lekker op det pas emijde gazunnegie.
Al gauw waar'k in dreumland. In mien dreum'n heurde ik stemmen, een ambulance heel in de verte, en een duudelijke vrouwenstemmen die schreeuwde:" Daar moet u zijn, daar ligt hij!"
Ik heurde de ambulance de brancard uut klapp'n en noe heurde ik ok een mannenstemme. En iniens werde ik vast egreep'n!
Zo waar'k lekker an't slaop'n en zo wer ik met een zwaai op de brancard esmeet'n!
Wat? Waor? Wie?
Ach toe liebe, wat he'k noe weer an de fietse hang'n? Die vrouwe was langs koom'n fietsen en hef mie daor in't half of emeijde grôs zien lig'n en hef gelieke 112 ebeld umdet e dacht det ik niet goed waare ewurde'n, die hef nooit in de gaat'n ehad de'k allinig maor een tukkie dee.
Ok disse keer zal ik oe het commentaar van Fennigje bespaor'n, wat heb ik op mien kop ekreeg'n, wat een klein tukkie al niet te weeg kan breng'n!
Pas goed op mekare! En probeer zo veule mogelijk van et mooie weer te geniet'n!
Fijne vakantie allemaole!